போதை என்பது ஒரு பாம்பு விஷம்தான் சேந்து குடிச்சா அது சோஸலிசம்தான். இந்த வரியின் மூலம் என்னதான் சொல்ல வருகிறார்கள், கேடுகளின் ஊற்றுக்கண்ணாக இருக்கும் திரைப்படங்களின் உளரல்களுக்கெல்லாம் விளக்கம் தேடினால் அதைவிட ஒரு கேலிக்கூத்தான விஷயம் வேறு ஏதும் இருக்காது..
எத்தனையோ எரி சாராயச் சாவுகள் நிகழ்ந்த வண்ணம் உள்ளன. ஆனால் திருந்துவோர்தான் இல்லை.
முன்பெல்லாம் சாரயம் குடிப்பவன் என்றாலே சமூகத்தில் ஒரு மதிப்பு(?) இருந்தது, அவனின் மனைவி மக்கள் படும் மன உலைச்சலுக்கு எல்லை இல்லை, சமூகத்தின் பார்வையில் அவன் ஒரு குற்றவளியாக பார்க்கப்பட்டான்.
ஆனால் இன்றோ கல்யாணம் என்றாலும், கருமாதி என்றாலும் "தண்ணி" பார்ட்டி வைத்திருக்க வேண்டும் என்பது எழுதப்படாத நியதி. கல்யாணம் என்றால் குஷியாக கொண்டாடுவதற்கும், கருமாதி என்றால் துக்கம் தீர்ப்பதற்க்கும் என்று காரணங்கள் பல சொல்லப் படுகின்றன.
இளைஞர்களில் பீர் குடிக்காதோரைக் காண்பது அரிது. "பீர் குடிச்சா குளிர்ச்சி" என்ற கொள்கை வெற்றி பெரும்பாலான இளைஞர்களின் தொப்பக்கு ஏதோ ஒரு வகையில் காரணமாகிப் போனது.
வியாழன் இரவு வந்து விட்டால் போதும், இங்கு துபையில் வசதிக்கு தகுந்தவாறு தண்ணீர் தாண்டவமாடும். 20 திர்ஹம் பாட்டில் நம் உழைக்கும் வர்க்கங்களுக்காக, கன்ஸ்ட்ரக்ஸன் பணி அல்லது க்ளீனிங் கம்பெனி பணியில் ஆறு நூறு, எழு நூறு ஊதியம் வாங்குவோர்தான் இந்த உழைக்கும் வர்க்கங்கள். "வாரத்தில ஒரு நாள்தானே மச்சான்" என்பது படிப்படியாக நாட்கணக்காகும். பிறகு வாங்கும் சம்பளம் கடனைச் செலுவதற்கே சரியாகும்.
ஹோட்டல் "பார்"களில் காசுக்காக ஆடும் இளம் பெண்களின் ஆட்டமும் சேர்ந்து கொள்ள குடித்து கும்மாளமிடுவோர் கைநிறைய சம்பளம் வாங்கும் கணவான்கள்.
மும்பையில் புது வருட இரவுக் கொண்டாட்டம் என்ற பெயரில் ஒரு பெண்ணிடம் கீழ்த்தரமாக நடந்து கொண்டது போதையின் தூண்டுதாலால்தான்.
மது அருந்துவதென்பது இன்று சர்வசாதரண ஒரு விஷயமாகிப் போனது காலத்தின் கோலம்.
போதையைப் பற்றியெல்லாம் ஒரு பதிவு என்று எண்ணும் அளவுக்கு இன்று இக் கொடிய பழக்கம் சமூகத்தில் புரையோடிப் போயுள்ளது.
இதன் மூலம் நன்மை இருக்கா இல்லை தீமை இருக்கா என்பதல்ல ஆராய்ச்சி. தீமைதான் உள்ளது என்பதில் எவ்வித சந்தேகமும் இல்லை. ஆனால் இவ்வளவு மோசமான ஒரு பழக்கம் எவ்வாறு நம் சமூகத்தில் சர்வ சாதரணமாக நுழைந்தது?.
